वैदेशिक रोजगारका नाममा ठगी: पूर्वमाओवादी लडाकु कमाण्डर लहानु चौधरी थानकोटबाट पक्राउ
काठमाडौँ वैदेशिक रोजगारीको प्रलोभन देखाएर सर्वसाधारणलाई ठगी गरेको आरोपमा नेपाल कम्युनिष्ट पार्टी (माओवादी) का पूर्वलडाकु कमाण्डर लहानुराम चौधरी पक्राउ परेका छन्। काठमाडौँ उपत्यका अपराध अनुसन्धान कार्यालयको टोलीले उनलाई शनिबार थानकोटबाट नियन्त्रणमा लिएको हो।
कैलालीको लम्कीचुहा नगरपालिका–६ स्थायी घर भई हाल काठमाडौँ बस्दै आएका ४६ वर्षीय चौधरीविरुद्ध वैदेशिक रोजगार विभागले पक्राउ पुर्जी जारी गरेको थियो। विभागको सोही अनुरोधका आधारमा प्रहरीले उनलाई पक्राउ गरेको उपत्यका अपराध अनुसन्धान कार्यालयका सूचना अधिकारी (एसपी) शरद थापाले जानकारी दिए।
वैदेशिक रोजगारको प्रलोभनमा करोडौँ ठगी गरेको आशंका
प्रहरीका अनुसार कमाण्डर चौधरीले आकर्षक वैदेशिक रोजगारीको प्रलोभन देखाएर विभिन्न व्यक्तिहरूबाट मोटो रकम असुल गरी ठगी गरेको प्रारम्भिक उजुरी परेको छ। विभागबाट पक्राउ अनुमति जारी भएपछि प्रहरीले उनको खोजी तीव्र पारेको थियो।
"आरोपी लहानु चौधरीलाई थानकोटबाट नियन्त्रणमा लिइएको छ। उनलाई थप अनुसन्धान र कानुनी कारबाहीका लागि वैदेशिक रोजगार विभागमा बुझाउने तयारी भइरहेको छ।"
पक्राउ परेका चौधरी तत्कालीन माओवादी सशस्त्र द्वन्द्वका क्रममा लडाकु कमाण्डरका रूपमा सक्रिय थिए। घटनाबारे थप विवरण र कुल ठगी रकमको यकिन परिमाण विभागको अनुसन्धानपछि खुल्ने प्रहरीले जनाएको छ।
0 Comments